Vikao vya bunge vyarejelea huku uteuzi wa wanakamati za shughuli za bunge ukijadiliwa

Hatimaye vikao vya bunge vimerejelea leo hii kwa mara ya kwanza mwaka huu huku jukumu la kwanza likiwa kujadili uteuzi wa watakaokuwa wanachama wa kamati za shughuli za bunge katika Bunge la Kitaifa, vilevile la Seneti. Aidha masuala ya mgomo wa wauguzi na matatizo katika sekta ya kilimo yamejadiliwa.

Vikao vya Bunge la Kitaifa na Seneti viling'oa nanga mwendo wa saa nane unusu ilivyo desturi siku ya Jumanne huku jukumu la kwanza la mabunge hayo likiwa kujadili uteuzi wa watakaohudumu katika kamati za shughuli za bunge. Wabunge walioteuliwa kuhudumu katika nyadhifa hizo katika Bunge la Kitaifa ni Amos Kimunya wa Kipipiri, Mwakilishi wa Kike wa Kaunti ya Turkana, Joyce Emanikor, Shadrack John Mose wa Kitutu Masaba na Mwakilishi wa Kike wa Kaunti ya Meru, Kawira Mwangaza.