Hali ya ukame kuliko kawaida inatarajiwa katika maeneo ya Pwani ya Kenya

Kituo cha Utabiri na Matumizi ya Taarifa za Hali ya Hewa cha IGAD (ICPAC), kwa kushirikiana na Huduma za Kitaifa za Utabiri wa Hali ya Hewa na Maji (NMHSs) kutoka nchi wanachama, Shirika la Hali ya Hewa Duniani (WMO), kimetoa utabiri wa hali ya hewa wa kikanda kwa msimu wa mvua za Machi hadi Mei 2026.

Kwa mujibu wa ICPAC, kuna uwezekano wa asilimia 45 wa mvua za juu ya wastani katika maeneo mengi ya Pembe ya Afrika. Maeneo hayo ni pamoja na sehemu kubwa za Uganda, Rwanda, Burundi, Tanzania, Kenya ya kati hadi magharibi, Ethiopia, Sudan Kusini, kaskazini mwa Somalia na Djibouti.

Wakati huo huo, asilimia 40 ya uwezekano wa mvua za wastani inatarajiwa katika magharibi na mashariki mwa Sudan Kusini, kaskazini-mashariki na kusini-magharibi mwa Kenya, sehemu kubwa ya Somalia, pwani ya Tanzania, pamoja na maeneo machache ya Uganda na Ethiopia.

Hata hivyo, hali ya ukame kuliko kawaida inatarajiwa katika maeneo ya pwani ya Kenya, hali inayohitaji tahadhari ya mapema kwa jamii na wadau wa sekta nyeti kama kilimo na maji.

Kwa jumla, mvua zinatarajiwa kuanza kwa wakati wa kawaida au mapema katika maeneo mengi ya ukanda. Hata hivyo, kuchelewa kwa mvua kunatarajiwa katika baadhi ya maeneo ya Ethiopia, Sudan Kusini na Somalia. ICPAC inaonya kuwa licha ya matarajio ya msimu, vipindi vya ukame vinaweza kujitokeza hata katika maeneo yenye mvua nyingi, na vivyo hivyo vipindi vya mvua kubwa vinaweza kutokea katika maeneo yanayotabiriwa kupata mvua chache.

Kuhusu joto, hali ya joto la juu kuliko wastani inatarajiwa katika maeneo mengi ya Pembe ya Afrika, hasa Sudan, Djibouti, Tanzania, pamoja na sehemu za Ethiopia, Somalia na Kenya. Kwa upande mwingine, hali ya baridi kuliko wastani inatarajiwa katika sehemu za kati hadi kaskazini mwa Ethiopia.

ICPAC sasa inazihimiza mataifa, mashirika ya kibinadamu na ya maendeleo Kutumia kwa pamoja utabiri wa kikanda wa ICPAC na taarifa za kitaifa na za maeneo madogo zinazotolewa na NMHSs, kufuatilia kwa karibu utabiri wa msimu, wa muda wa kati na wa muda mfupi ili kusaidia mipango na maamuzi ya haraka pamoja na kuongeza maandalizi na hatua za tahadhari ili kupunguza athari za mafuriko na ukame, kulinda maisha, riziki na miundombinu muhimu.