News

by Victor Mulama | Posted at 10/05/22

Kiongozi wa Wiper, Kalonzo Musyoka ametetea uamuzi wake wa kubadili msimamo na kwenda kuhojiwa na jopo la mchujo wa kumtafuta mgombea mwenza wa Raila Odinga, katika Chama cha Muungano wa Azimio la Umoja One Kenya.

Akizungumza na wanahabari baada ya kujiwasilisha mbele ya jopo linaloongozwa na Noah Wekesea, Kalonzo sawa na wenzake waliofika mbele ya jopo siku iliyotangulia, ametaja kikao hicho kuwa cha gumzo tu kuhusu mikakati, na kwamba hayakuwa mahojiano kama yale ya kutafuta kazi.

Amesema hawezi kufichua mambo yaliyoangaziwa, na kwamba aliamua kuhudhuria ili kuondoa vikwazo ambavyo huenda vingetumika kumzuia kupewa wadhifa huo iwapo asingejiwasilisha.

Aidha, Kalonzo amesema ana matumaini ya kuteuliwa kuwa mgombea mwenza wa Raila kutokana na gumzo walilokuwa nalo, akisema hakulazimishwa na yeyote kuhudhuria kikao hicho.

Kalonzo amekuwa akisisitiza kwamba asingehudhuria mahojiano kwa vile hadhi, na ufuasi wake unajulikana.

Pia alitishia kwamba iwapo Odinga asingemteua kuwa mgombea mwenza, huenda kura za jamii ya Akamba zingeelekezwa kwa Naibu wa Rais, William Ruto ambaye amekuwa akizuru eneo hilo mara kwa mara kuwashawishi wakazi kumuunga mkono.

Aidha, alitishia kujiondoa iwapo hatakuwa mgombea mwenza wa Raila.

Chama cha KANU chake, Gideon Moi kilimpendekeza Kalonzo kuwa mgombea mwenza wa Odinga. Wengine waliofika katika jopo hilo ni Martha Karua, magavana Ali Hassan Joho, Wycliffe Oparanya, Lee Kinyanjui na Mwakilishi wa Kike wa Kaunti ya Murang'a Sabina Chege.

Watakaohojiwa baada ya Kalonzo ni Peter Kenneth, Peter Munya, Charity Ngilu na Stephen Tarus.

Baadaye jina la mmoja wao litawasilishwa kwa Odinga ambaye atalitathmini kabla kutangazwa.

Ikumbukwe wagombea urais na ugavana wana hadi Jumatatu ijayo kuwasilisha majina ya wagombea wenza kulingana na makataa ya Tume ya Uchaguzi IEBC.